شو ناطرين ……. المحامي طوني متى.
شو ناطرين من شعب بيرمي المسؤولية يميناً ويساراً من دون وجه حقّ .
شو ناطرين من شعب بينتخب نفس الحكّام من دون تفكير .
شو ناطرين من شعب بيهلّل للفاسد وبيقوّص بوجه الآدمي .
شو ناطرين من شعب بيتحرّك كرمال الواتس أپ وما بيتحرّك كرمال رغيف الخبز .
شو ناطرين من شعب بيتظاهر كرمال الأرجيلة وما بيتظاهر كرمال غلاء الأسعار .
شو ناطرين من شعب بيفرح إذا ارتفع الدولار وبيزعل اذا نزل .
شو ناطرين من شعب بينطر أمام باب المصرف حتى يعطيه حسنة من أمواله .
شو ناطرين من شعب رابط مستقبلو بتوقعات ميشال وليلى و….
شو ناطرين من شعب كل فئة منه بدها تحاسب زعيم الفئة الأخرى .
شو ناطرين من شعب بيرمي التهمة على المسؤولين إذا هوي ما حافظ على صحته.
شو ناطرين من شعب بيخالف القانون وبالآخر الحق على غيرو.
شو ناطرين من شعب بدّو كل واحد فيه بلد على قياسه .
شو ناطرين من شعب بدّو المحاسبة وما بدّو يتحاسب.
شو ناطرين من شعب بينظّر أكثر ما بيفعل .
شو ناطرين من شعب بيقتل غيرو بس كرمال يكون هوّي مبسوط .
شو ناطرين من شعب مفهوم السرقة عندو شطارة .
شو ناطرين من شعب مين ما أخذ أمه بيعيّطلو يا عمّي .
شو ناطرين من شعب بدو يبني بلد بي هيك نفسيّة .
شو ناطرين من شعب …… واللائحة تطول وتطول وتطول الى ما لا نهاية .
في الآخر هنالك مثل شعبي يقول " هيك قنّينة بدها هيك فلّينة ." أي هكذا شعب بزيادة عليه هكذا حكّام.
للأسف هيك شعب مش ممكن يعيش إلا في كوكب ثان ٍلانه يشكل خطر على محيطه .
في النهاية ندعو الله أن يحمي بلدنا من غباوة وتبعية شعبه وفساد مسؤوليه وإعطاء القوّة لكل من يريد بناء وطن حقيقي خالٍ من التبعية والفاسدين كي نتمكّن من العيش فيه بكرامة وأمان مع أبنائنا أسوة بباقي البلدان المتحضّرة .
# كل عام والشرفاء والوطن بألف خير .#
# صباح الخير .#

مجموعة قنوات STARLEBANON ووكالة أخبار لبنان LEBANON NEWS
للإعلامي حيدر محمد هادي الحسيني